www.katabiblon.com
איובEyov (Job) | |||
| Westminster Leningrad Codex | Wiki English Translation / World English Bible | ||
|---|---|---|---|
| 1 | וְעַתָּ֤ה ׀ שָֽׂחֲק֣וּ עָלַי֮ צְעִירִ֥ים מִמֶּ֗נִּי לְיָ֫מִ֥ים אֲשֶׁר ־ מָאַ֥סְתִּי אֲבוֹתָ֑ם לָ֝שִׁ֗ית עִם ־ כַּלְבֵ֥י צֹאנִֽי ׃ | Jb 30:1 | “But now those who are younger than I have me in derision, |
| 2 | גַּם ־ כֹּ֣חַ יְ֭דֵיהֶם לָ֣מָּה לִּ֑י עָ֝לֵ֗ימוֹ אָ֣בַד כָּֽלַח ׃ | Jb 30:2 |
|
| 3 | בְּחֶ֥סֶר וּבְכָפָ֗ן גַּ֫לְמ֥וּד הַֽעֹרְקִ֥ים צִיָּ֑ה אֶ֝֗מֶשׁ שׁוֹאָ֥ה וּמְשֹׁאָֽה ׃ | Jb 30:3 |
|
| 4 | הַקֹּטְפִ֣ים מַלּ֣וּחַ עֲלֵי ־ שִׂ֑יחַ וְשֹׁ֖רֶשׁ רְתָמִ֣ים לַחְמָֽם ׃ | Jb 30:4 |
|
| 5 | מִן ־ גֵּ֥ו יְגֹרָ֑שׁוּ יָרִ֥יעוּ עָ֝לֵ֗ימוֹ כַּגַּנָּֽב ׃ | Jb 30:5 |
|
| 6 | בַּעֲר֣וּץ נְחָלִ֣ים לִשְׁכֹּ֑ן חֹרֵ֖י עָפָ֣ר וְכֵפִֽים ׃ | Jb 30:6 |
|
| 7 | בֵּין ־ שִׂיחִ֥ים יִנְהָ֑קוּ תַּ֖חַת חָר֣וּל יְסֻפָּֽחוּ ׃ | Jb 30:7 |
|
| 8 | בְּֽנֵי ־ נָ֭בָל גַּם ־ בְּנֵ֣י בְלִי ־ שֵׁ֑ם נִ֝כְּא֗וּ מִן ־ הָאָֽרֶץ ׃ | Jb 30:8 |
|
| 9 | וְ֭עַתָּה נְגִינָתָ֣ם הָיִ֑יתִי וָאֱהִ֖י לָהֶ֣ם לְמִלָּֽה ׃ | Jb 30:9 |
|
| 10 | תִּֽ֭עֲבוּנִי רָ֣חֲקוּ מֶ֑נִּי וּ֝מִפָּנַ֗י לֹא ־ חָ֥שְׂכוּ רֹֽק ׃ | Jb 30:10 |
|
| 11 | כִּֽי ־ { יתרו ⬪ יִתְרִ֣י } פִ֭תַּח וַיְעַנֵּ֑נִי וְ֝רֶ֗סֶן מִפָּנַ֥י שִׁלֵּֽחוּ ׃ | Jb 30:11 |
|
| 12 | עַל ־ יָמִין֮ פִּרְחַ֪ח יָ֫ק֥וּמוּ רַגְלַ֥י שִׁלֵּ֑חוּ וַיָּסֹ֥לּוּ עָ֝לַ֗י אָרְח֥וֹת אֵידָֽם ׃ | Jb 30:12 |
|
| 13 | נָתְס֗וּ נְֽתִיבָ֫תִ֥י לְהַוָּתִֽי יֹעִ֑ילוּ לֹ֖א עֹזֵ֣ר לָֽמוֹ ׃ | Jb 30:13 |
|
| 14 | כְּפֶ֣רֶץ רָחָ֣ב יֶאֱתָ֑יוּ תַּ֥חַת שֹׁ֝אָ֗ה הִתְגַּלְגָּֽלוּ ׃ | Jb 30:14 |
|
| 15 | הָהְפַּ֥ךְ עָלַ֗י בַּלָּ֫ה֥וֹת תִּרְדֹּ֣ף כָּ֭רוּחַ נְדִבָתִ֑י וּ֝כְעָ֗ב עָבְרָ֥ה יְשֻׁעָתִֽי ׃ | Jb 30:15 |
|
| 16 | וְעַתָּ֗ה עָ֭לַי תִּשְׁתַּפֵּ֣ךְ נַפְשִׁ֑י יֹ֖אחֲז֣וּנִי יְמֵי ־ עֹֽנִי ׃ | Jb 30:16 |
|
| 17 | לַ֗יְלָה עֲ֭צָמַי נִקַּ֣ר מֵעָלָ֑י וְ֝עֹרְקַ֗י לֹ֣א יִשְׁכָּבֽוּן ׃ | Jb 30:17 |
|
| 18 | בְּרָב ־ כֹּ֭חַ יִתְחַפֵּ֣שׂ לְבוּשִׁ֑י כְּפִ֖י כֻתָּנְתִּ֣י יַֽאַזְרֵֽנִי ׃ | Jb 30:18 |
|
| 19 | הֹרָ֥נִי לַחֹ֑מֶר וָ֝אֶתְמַשֵּׁ֗ל כֶּעָפָ֥ר וָאֵֽפֶר ׃ | Jb 30:19 |
|
| 20 | אֲשַׁוַּ֣ע אֵ֭לֶיךָ וְלֹ֣א תַעֲנֵ֑נִי עָ֝מַ֗דְתִּי וַתִּתְבֹּ֥נֶן בִּֽי ׃ | Jb 30:20 |
|
| 21 | תֵּהָפֵ֣ךְ לְאַכְזָ֣ר לִ֑י בְּעֹ֖צֶם יָדְךָ֣ תִשְׂטְמֵֽנִי ׃ | Jb 30:21 |
|
| 22 | תִּשָּׂאֵ֣נִי אֶל ־ ר֭וּחַ תַּרְכִּיבֵ֑נִי וּ֝תְמֹגְגֵ֗נִי { תשוה ⬪ תּוּשִׁיָּֽה ׃ } | Jb 30:22 |
|
| 23 | כִּֽי ־ יָ֭דַעְתִּי מָ֣וֶת תְּשִׁיבֵ֑נִי וּבֵ֖ית מוֹעֵ֣ד לְכָל ־ חָֽי ׃ | Jb 30:23 |
|
| 24 | אַ֣ךְ לֹא ־ בְ֭עִי יִשְׁלַח ־ יָ֑ד אִם ־ בְּ֝פִיד֗וֹ לָהֶ֥ן שֽׁוּעַ ׃ | Jb 30:24 |
|
| 25 | אִם ־ לֹ֣א בָ֭כִיתִי לִקְשֵׁה ־ י֑וֹם עָֽגְמָ֥ה נַ֝פְשִׁ֗י לָאֶבְיֽוֹן ׃ | Jb 30:25 |
|
| 26 | כִּ֤י ט֣וֹב קִ֭וִּיתִי וַיָּ֣בֹא רָ֑ע וַֽאֲיַחֲלָ֥ה לְ֝א֗וֹר וַיָּ֥בֹא אֹֽפֶל ׃ | Jb 30:26 |
|
| 27 | מֵעַ֖י רֻתְּח֥וּ וְלֹא ־ דָ֗מּוּ קִדְּמֻ֥נִי יְמֵי ־ עֹֽנִי ׃ | Jb 30:27 |
|
| 28 | קֹדֵ֣ר הִ֭לַּכְתִּי בְּלֹ֣א חַמָּ֑ה קַ֖מְתִּי בַקָּהָ֣ל אֲשַׁוֵּֽעַ ׃ | Jb 30:28 |
|
| 29 | אָ֭ח הָיִ֣יתִי לְתַנִּ֑ים וְ֝רֵ֗עַ לִבְנ֥וֹת יַעֲנָֽה ׃ | Jb 30:29 |
|
| 30 | ע֭וֹרִי שָׁחַ֣ר מֵעָלָ֑י וְעַצְמִי ־ חָ֝֗רָה מִנִּי ־ חֹֽרֶב ׃ | Jb 30:30 |
|
| 31 | וַיְהִ֣י לְ֭אֵבֶל כִּנֹּרִ֑י וְ֝עֻגָבִ֗י לְק֣וֹל בֹּכִֽים ׃ | Jb 30:31 |
|
| « Ch 29 | » Ch 31 |
Copyright 2007-2020 Thomas Moore, Email: acct3 at katabiblon.com, Support Forum Set Local Timezone
Tuesday, 22-Sep-2020 16:55:18 EDT