www.katabiblon.com
| Hide | |||
דבריםDevarim (Deuteronomy) | |||
| Westminster Leningrad Codex | Wiki English Translation / World English Bible | ||
|---|---|---|---|
| 1 | הַאֲזִ֥ינוּ הַשָּׁמַ֖יִם וַאֲדַבֵּ֑רָה וְתִשְׁמַ֥ע הָאָ֖רֶץ אִמְרֵי ־ פִֽי ׃ | Dt 32:1 |
|
| 2 | יַעֲרֹ֤ף כַּמָּטָר֙ לִקְחִ֔י תִּזַּ֥ל כַּטַּ֖ל אִמְרָתִ֑י כִּשְׂעִירִ֣ם עֲלֵי ־ דֶ֔שֶׁא וְכִרְבִיבִ֖ים עֲלֵי ־ עֵֽשֶׂב ׃ | Dt 32:2 |
|
| 3 | כִּ֛י שֵׁ֥ם יְהוָ֖ה אֶקְרָ֑א הָב֥וּ גֹ֖דֶל לֵאלֹהֵֽינוּ ׃ | Dt 32:3 |
|
| 4 | הַצּוּר֙ תָּמִ֣ים פָּעֳל֔וֹ כִּ֥י כָל ־ דְּרָכָ֖יו מִשְׁפָּ֑ט אֵ֤ל אֱמוּנָה֙ וְאֵ֣ין עָ֔וֶל צַדִּ֥יק וְיָשָׁ֖ר הֽוּא ׃ | Dt 32:4 |
|
| 5 | שִׁחֵ֥ת ל֛וֹ לֹ֖א בָּנָ֣יו מוּמָ֑ם דּ֥וֹר עִקֵּ֖שׁ וּפְתַלְתֹּֽל ׃ | Dt 32:5 |
|
| 6 | הֲ ־ לַיְהוָה֙ תִּגְמְלוּ ־ זֹ֔את עַ֥ם נָבָ֖ל וְלֹ֣א חָכָ֑ם הֲלוֹא ־ הוּא֙ אָבִ֣יךָ קָּנֶ֔ךָ ה֥וּא עָֽשְׂךָ֖ וַֽיְכֹנְנֶֽךָ ׃ | Dt 32:6 |
|
| 7 | זְכֹר֙ יְמ֣וֹת עוֹלָ֔ם בִּ֖ינוּ שְׁנ֣וֹת דּוֹר ־ וָד֑וֹר שְׁאַ֤ל אָבִ֙יךָ֙ וְיַגֵּ֔דְךָ זְקֵנֶ֖יךָ וְיֹ֥אמְרוּ לָֽךְ ׃ | Dt 32:7 |
|
| 8 | בְּהַנְחֵ֤ל עֶלְיוֹן֙ גּוֹיִ֔ם בְּהַפְרִיד֖וֹ בְּנֵ֣י אָדָ֑ם יַצֵּב֙ גְּבֻלֹ֣ת עַמִּ֔ים לְמִסְפַּ֖ר בְּנֵ֥י יִשְׂרָאֵֽל ׃ | Dt 32:8 |
|
| 9 | כִּ֛י חֵ֥לֶק יְהֹוָ֖ה עַמּ֑וֹ יַעֲקֹ֖ב חֶ֥בֶל נַחֲלָתֽוֹ ׃ | Dt 32:9 |
|
| 10 | יִמְצָאֵ֙הוּ֙ בְּאֶ֣רֶץ מִדְבָּ֔ר וּבְתֹ֖הוּ יְלֵ֣ל יְשִׁמֹ֑ן יְסֹֽבְבֶ֙נְהוּ֙ יְב֣וֹנְנֵ֔הוּ יִצְּרֶ֖נְהוּ כְּאִישׁ֥וֹן עֵינֽוֹ ׃ | Dt 32:10 |
|
| 11 | כְּנֶ֙שֶׁר֙ יָעִ֣יר קִנּ֔וֹ עַל ־ גּוֹזָלָ֖יו יְרַחֵ֑ף יִפְרֹ֤שׂ כְּנָפָיו֙ יִקָּחֵ֔הוּ יִשָּׂאֵ֖הוּ עַל ־ אֶבְרָתֽוֹ ׃ | Dt 32:11 |
|
| 12 | יְהוָ֖ה בָּדָ֣ד יַנְחֶ֑נּוּ וְאֵ֥ין עִמּ֖וֹ אֵ֥ל נֵכָֽר ׃ | Dt 32:12 |
|
| 13 | יַרְכִּבֵ֙הוּ֙ עַל ־ { במותי ◆ בָּ֣מֳתֵי } אָ֔רֶץ וַיֹּאכַ֖ל תְּנוּבֹ֣ת שָׂדָ֑י וַיֵּנִקֵ֤הֽוּ דְבַשׁ֙ מִסֶּ֔לַע וְשֶׁ֖מֶן מֵחַלְמִ֥ישׁ צֽוּר ׃ | Dt 32:13 |
|
| 14 | חֶמְאַ֨ת בָּקָ֜ר וַחֲלֵ֣ב צֹ֗אן עִם ־ חֵ֨לֶב כָּרִ֜ים וְאֵילִ֤ים בְּנֵֽי ־ בָשָׁן֙ וְעַתּוּדִ֔ים עִם ־ חֵ֖לֶב כִּלְי֣וֹת חִטָּ֑ה וְדַם ־ עֵנָ֖ב תִּשְׁתֶּה ־ חָֽמֶר ׃ | Dt 32:14 |
|
| 15 | וַיִּשְׁמַ֤ן יְשֻׁרוּן֙ וַיִּבְעָ֔ט שָׁמַ֖נְתָּ עָבִ֣יתָ כָּשִׂ֑יתָ וַיִּטֹּשׁ֙ אֱל֣וֹהַ עָשָׂ֔הוּ וַיְנַבֵּ֖ל צ֥וּר יְשֻׁעָתֽוֹ ׃ | Dt 32:15 |
|
| 16 | יַקְנִאֻ֖הוּ בְּזָרִ֑ים בְּתוֹעֵבֹ֖ת יַכְעִיסֻֽהוּ ׃ | Dt 32:16 |
|
| 17 | יִזְבְּח֗וּ לַשֵּׁדִים֙ לֹ֣א אֱלֹ֔הַ אֱלֹהִ֖ים לֹ֣א יְדָע֑וּם חֲדָשִׁים֙ מִקָּרֹ֣ב בָּ֔אוּ לֹ֥א שְׂעָר֖וּם אֲבֹתֵיכֶֽם ׃ | Dt 32:17 |
|
| 18 | צ֥וּר יְלָדְךָ֖ תֶּ֑שִׁי וַתִּשְׁכַּ֖ח אֵ֥ל מְחֹלְלֶֽךָ ׃ | Dt 32:18 |
|
| 19 | וַיַּ֥רְא יְהוָ֖ה וַיִּנְאָ֑ץ מִכַּ֥עַס בָּנָ֖יו וּבְנֹתָֽיו ׃ | Dt 32:19 |
|
| 20 | וַיֹּ֗אמֶר אַסְתִּ֤ירָה פָנַי֙ מֵהֶ֔ם אֶרְאֶ֖ה מָ֣ה אַחֲרִיתָ֑ם כִּ֣י ד֤וֹר תַּהְפֻּכֹת֙ הֵ֔מָּה בָּנִ֖ים לֹא ־ אֵמֻ֥ן בָּֽם ׃ | Dt 32:20 |
|
| 21 | הֵ֚ם קִנְא֣וּנִי בְלֹא ־ אֵ֔ל כִּעֲס֖וּנִי בְּהַבְלֵיהֶ֑ם וַאֲנִי֙ אַקְנִיאֵ֣ם בְּלֹא ־ עָ֔ם בְּג֥וֹי נָבָ֖ל אַכְעִיסֵֽם ׃ | Dt 32:21 |
|
| 22 | כִּי ־ אֵשׁ֙ קָדְחָ֣ה בְאַפִּ֔י וַתִּיקַ֖ד עַד ־ שְׁא֣וֹל תַּחְתִּ֑ית וַתֹּ֤אכַל אֶ֙רֶץ֙ וִֽיבֻלָ֔הּ וַתְּלַהֵ֖ט מוֹסְדֵ֥י הָרִֽים ׃ | Dt 32:22 |
|
| 23 | אַסְפֶּ֥ה עָלֵ֖ימוֹ רָע֑וֹת חִצַּ֖י אֲכַלֶּה ־ בָּֽם ׃ | Dt 32:23 |
|
| 24 | מְזֵ֥י רָעָ֛ב וּלְחֻ֥מֵי רֶ֖שֶׁף וְקֶ֣טֶב מְרִירִ֑י וְשֶׁן ־ בְּהֵמוֹת֙ אֲשַׁלַּח ־ בָּ֔ם עִם ־ חֲמַ֖ת זֹחֲלֵ֥י עָפָֽר ׃ | Dt 32:24 |
|
| 25 | מִחוּץ֙ תְּשַׁכֶּל ־ חֶ֔רֶב וּמֵחֲדָרִ֖ים אֵימָ֑ה גַּם ־ בָּחוּר֙ גַּם ־ בְּתוּלָ֔ה יוֹנֵ֖ק עִם ־ אִ֥ישׁ שֵׂיבָֽה ׃ | Dt 32:25 |
|
| 26 | אָמַ֖רְתִּי אַפְאֵיהֶ֑ם אַשְׁבִּ֥יתָה מֵאֱנ֖וֹשׁ זִכְרָֽם ׃ | Dt 32:26 |
|
| 27 | לוּלֵ֗י כַּ֤עַס אוֹיֵב֙ אָג֔וּר פֶּֽן ־ יְנַכְּר֖וּ צָרֵ֑ימוֹ פֶּן ־ יֹֽאמְרוּ֙ יָדֵ֣ינוּ רָ֔מָה וְלֹ֥א יְהוָ֖ה פָּעַ֥ל כָּל ־ זֹֽאת ׃ | Dt 32:27 |
|
| 28 | כִּי ־ ג֛וֹי אֹבַ֥ד עֵצ֖וֹת הֵ֑מָּה וְאֵ֥ין בָּהֶ֖ם תְּבוּנָֽה ׃ | Dt 32:28 |
|
| 29 | ל֥וּ חָכְמ֖וּ יַשְׂכִּ֣ילוּ זֹ֑את יָבִ֖ינוּ לְאַחֲרִיתָֽם ׃ | Dt 32:29 |
|
| 30 | אֵיכָ֞ה יִרְדֹּ֤ף אֶחָד֙ אֶ֔לֶף וּשְׁנַ֖יִם יָנִ֣יסוּ רְבָבָ֑ה אִם ־ לֹא֙ כִּי ־ צוּרָ֣ם מְכָרָ֔ם וַֽיהוָ֖ה הִסְגִּירָֽם ׃ | Dt 32:30 |
|
| 31 | כִּ֛י לֹ֥א כְצוּרֵ֖נוּ צוּרָ֑ם וְאֹיְבֵ֖ינוּ פְּלִילִֽים ׃ | Dt 32:31 |
|
| 32 | כִּֽי ־ מִגֶּ֤פֶן סְדֹם֙ גַּפְנָ֔ם וּמִשַּׁדְמֹ֖ת עֲמֹרָ֑ה עֲנָבֵ֙מוֹ֙ עִנְּבֵי ־ ר֔וֹשׁ אַשְׁכְּלֹ֥ת מְרֹרֹ֖ת לָֽמוֹ ׃ | Dt 32:32 |
|
| 33 | חֲמַ֥ת תַּנִּינִ֖ם יֵינָ֑ם וְרֹ֥אשׁ פְּתָנִ֖ים אַכְזָֽר ׃ | Dt 32:33 |
|
| 34 | הֲלֹא ־ ה֖וּא כָּמֻ֣ס עִמָּדִ֑י חָתֻ֖ם בְּאוֹצְרֹתָֽי ׃ | Dt 32:34 |
|
| 35 | לִ֤י נָקָם֙ וְשִׁלֵּ֔ם לְעֵ֖ת תָּמ֣וּט רַגְלָ֑ם כִּ֤י קָרוֹב֙ י֣וֹם אֵידָ֔ם וְחָ֖שׁ עֲתִדֹ֥ת לָֽמוֹ ׃ | Dt 32:35 |
|
| 36 | כִּֽי ־ יָדִ֤ין יְהוָה֙ עַמּ֔וֹ וְעַל ־ עֲבָדָ֖יו יִתְנֶחָ֑ם כִּ֤י יִרְאֶה֙ כִּי ־ אָ֣זְלַת יָ֔ד וְאֶ֖פֶס עָצ֥וּר וְעָזֽוּב ׃ | Dt 32:36 |
|
| 37 | וְאָמַ֖ר אֵ֣י אֱלֹהֵ֑ימוֹ צ֖וּר חָסָ֥יוּ בֽוֹ ׃ | Dt 32:37 |
|
| 38 | אֲשֶׁ֨ר חֵ֤לֶב זְבָחֵ֙ימוֹ֙ יֹאכֵ֔לוּ יִשְׁתּ֖וּ יֵ֣ין נְסִיכָ֑ם יָק֙וּמוּ֙ וְיַעְזְרֻכֶ֔ם יְהִ֥י עֲלֵיכֶ֖ם סִתְרָֽה ׃ | Dt 32:38 |
|
| 39 | רְא֣וּ ׀ עַתָּ֗ה כִּ֣י אֲנִ֤י אֲנִי֙ ה֔וּא וְאֵ֥ין אֱלֹהִ֖ים עִמָּדִ֑י אֲנִ֧י אָמִ֣ית וַאֲחַיֶּ֗ה מָחַ֙צְתִּי֙ וַאֲנִ֣י אֶרְפָּ֔א וְאֵ֥ין מִיָּדִ֖י מַצִּֽיל ׃ | Dt 32:39 |
|
| 40 | כִּֽי ־ אֶשָּׂ֥א אֶל ־ שָׁמַ֖יִם יָדִ֑י וְאָמַ֕רְתִּי חַ֥י אָנֹכִ֖י לְעֹלָֽם ׃ | Dt 32:40 |
|
| 41 | אִם ־ שַׁנּוֹתִי֙ בְּרַ֣ק חַרְבִּ֔י וְתֹאחֵ֥ז בְּמִשְׁפָּ֖ט יָדִ֑י אָשִׁ֤יב נָקָם֙ לְצָרָ֔י וְלִמְשַׂנְאַ֖י אֲשַׁלֵּֽם ׃ | Dt 32:41 |
|
| 42 | אַשְׁכִּ֤יר חִצַּי֙ מִדָּ֔ם וְחַרְבִּ֖י תֹּאכַ֣ל בָּשָׂ֑ר מִדַּ֤ם חָלָל֙ וְשִׁבְיָ֔ה מֵרֹ֖אשׁ פַּרְע֥וֹת אוֹיֵֽב ׃ | Dt 32:42 |
|
| 43 | הַרְנִ֤ינוּ גוֹיִם֙ עַמּ֔וֹ כִּ֥י דַם ־ עֲבָדָ֖יו יִקּ֑וֹם וְנָקָם֙ יָשִׁ֣יב לְצָרָ֔יו וְכִפֶּ֥ר אַדְמָת֖וֹ עַמּֽוֹ ׃ פ | Dt 32:43 |
|
| 44 | וַיָּבֹ֣א מֹשֶׁ֗ה וַיְדַבֵּ֛ר אֶת ־ כָּל ־ דִּבְרֵ֥י הַשִּׁירָֽה ־ הַזֹּ֖את בְּאָזְנֵ֣י הָעָ֑ם ה֖וּא וְהוֹשֵׁ֥עַ בִּן ־ נֽוּן ׃ | Dt 32:44 | ¶Moses came and spoke all the words of this song in the ears of the people, he and Joshua the son of Nun. |
| 45 | וַיְכַ֣ל מֹשֶׁ֗ה לְדַבֵּ֛ר אֶת ־ כָּל ־ הַדְּבָרִ֥ים הָאֵ֖לֶּה אֶל ־ כָּל ־ יִשְׂרָאֵֽל ׃ | Dt 32:45 | Moses made an end of speaking all these words to all Israel; |
| 46 | וַיֹּ֤אמֶר אֲלֵהֶם֙ שִׂ֣ימוּ לְבַבְכֶ֔ם לְכָל ־ הַדְּבָרִ֔ים אֲשֶׁ֧ר אָנֹכִ֛י מֵעִ֥יד בָּכֶ֖ם הַיּ֑וֹם אֲשֶׁ֤ר תְּצַוֻּם֙ אֶת ־ בְּנֵיכֶ֔ם לִשְׁמֹ֣ר לַעֲשׂ֔וֹת אֶת ־ כָּל ־ דִּבְרֵ֖י הַתּוֹרָ֥ה הַזֹּֽאת ׃ | Dt 32:46 | He said to them, “Set your heart to all the words which I testify to you this day, which you shall command your children to observe to do, even all the words of this law. |
| 47 | כִּ֠י לֹֽא ־ דָבָ֨ר רֵ֥ק הוּא֙ מִכֶּ֔ם כִּי ־ ה֖וּא חַיֵּיכֶ֑ם וּבַדָּבָ֣ר הַזֶּ֗ה תַּאֲרִ֤יכוּ יָמִים֙ עַל ־ הָ֣אֲדָמָ֔ה אֲשֶׁ֨ר אַתֶּ֜ם עֹבְרִ֧ים אֶת ־ הַיַּרְדֵּ֛ן שָׁ֖מָּה לְרִשְׁתָּֽהּ ׃ פ | Dt 32:47 | For it is no vain thing for you; because it is your life, and through this thing you shall prolong your days in the land, where you go over the Jordan to possess it.” |
| 48 | וַיְדַבֵּ֤ר יְהוָה֙ אֶל ־ מֹשֶׁ֔ה בְּעֶ֛צֶם הַיּ֥וֹם הַזֶּ֖ה לֵאמֹֽר ׃ | Dt 32:48 | ¶Yahweh spoke to Moses that same day, saying, |
| 49 | עֲלֵ֡ה אֶל ־ הַר֩ הָעֲבָרִ֨ים הַזֶּ֜ה הַר ־ נְב֗וֹ אֲשֶׁר֙ בְּאֶ֣רֶץ מוֹאָ֔ב אֲשֶׁ֖ר עַל ־ פְּנֵ֣י יְרֵח֑וֹ וּרְאֵה֙ אֶת ־ אֶ֣רֶץ כְּנַ֔עַן אֲשֶׁ֨ר אֲנִ֥י נֹתֵ֛ן לִבְנֵ֥י יִשְׂרָאֵ֖ל לַאֲחֻזָּֽה ׃ | Dt 32:49 | “Go up into this mountain of Abarim, to Mount Nebo, which is in the land of Moab, that is over against Jericho; and see the land of Canaan, which I give to the children of Israel for a possession; |
| 50 | וּמֻ֗ת בָּהָר֙ אֲשֶׁ֤ר אַתָּה֙ עֹלֶ֣ה שָׁ֔מָּה וְהֵאָסֵ֖ף אֶל ־ עַמֶּ֑יךָ כַּֽאֲשֶׁר ־ מֵ֞ת אַהֲרֹ֤ן אָחִ֙יךָ֙ בְּהֹ֣ר הָהָ֔ר וַיֵּאָ֖סֶף אֶל ־ עַמָּֽיו ׃ | Dt 32:50 | and die on the mountain where you go up, and be gathered to your people, as Aaron your brother died on Mount Hor, and was gathered to his people: |
| 51 | עַל֩ אֲשֶׁ֨ר מְעַלְתֶּ֜ם בִּ֗י בְּתוֹךְ֙ בְּנֵ֣י יִשְׂרָאֵ֔ל בְּמֵֽי ־ מְרִיבַ֥ת קָדֵ֖שׁ מִדְבַּר ־ צִ֑ן עַ֣ל אֲשֶׁ֤ר לֹֽא ־ קִדַּשְׁתֶּם֙ אוֹתִ֔י בְּת֖וֹךְ בְּנֵ֥י יִשְׂרָאֵֽל ׃ | Dt 32:51 | because you trespassed against me in the midst of the children of Israel at the waters of Meribah of Kadesh, in the wilderness of Zin; because you didn’t sanctify me in the midst of the children of Israel. |
| 52 | כִּ֥י מִנֶּ֖גֶד תִּרְאֶ֣ה אֶת ־ הָאָ֑רֶץ וְשָׁ֙מָּה֙ לֹ֣א תָב֔וֹא אֶל ־ הָאָ֕רֶץ אֲשֶׁר ־ אֲנִ֥י נֹתֵ֖ן לִבְנֵ֥י יִשְׂרָאֵֽל ׃ פ | Dt 32:52 | For you shall see the land before you; but you shall not go there into the land which I give the children of Israel.” |
| « Ch 31 | » Ch 33 |
Copyright 2007-2019 Thomas Moore, Email: acct3 at katabiblon.com, Support Forum Set Local Timezone
Wednesday, 11-Dec-2019 19:26:34 EST